ცივ-გომბორის აღკვეთილის ტყის მართვის გეგმის პროექტის საჯარო განხილვა საგარეჯოს მუნიციპალიტეტში გაიმართა.
ტყეთმოწყობისა და ტყის მართვის გეგმის შემუშავების მიზანია ტყის აღრიცხვის, დაცვის, მოვლისა და აღდგენა-გაშენების ღონისძიებების განხორციელებისა და მათი ეფექტიანობის გაზრდის, ასევე, ტყის რესურსების მდგრადი სარგებლობის დაგეგმვისა და მართვის ხელშეწყობა.
ცივ-გომბორის აღკვეთილის ტყის მართვის გეგმის პროექტის საჯარო განხილვას ესწრებოდნენ საქართველოს გარემოს დაცვისა და სოფლის მეურნეობის სამინისტროს, დაცული ტერიტორების სააგენტოს, მარიამჯვარის დაცული ტერიტორიების ადმინისტრაციის, ადგილობრივი მუნიციპალიტეტის, პროექტის განმახორციელებელი კომპანიის წარმომადგენლები და სხვა დაინტერესებული მხარეები.
საჯარო განხილვისას დაინტერესებული მხარეების მიერ გამოთქმული მოსაზრებები და რეკომენდაციები გათვალისწინებული იქნება დოკუმენტის საბოლოო ვერსიაში.
ტყის მართვის გეგმა შემუშავებულია საქართველოს ტყის კოდექსის 26-ე მუხლისა და საქართველოს მთავრობის 2021 წლის 25 აგვისტოს N 427 დადგენილებით დამტკიცებული ,,საქართველოს ტყის აღრიცხვის სისტემის, კატეგორიზაციისა და მონიტორინგის წესის დებულების“ მიხედვით და ძალაშია მისი დამტკიცებიდან მომავალი 10 წლის განმავლობაში.
დაცული ტერიტორიების სააგენტოს მართვას დაქვემდებარებულ ცივ-გომბორის აღკვეთილის ტერიტორიაზე ტყეთმოწყობის სამუშაოები განხორციელდა და ტყის მართვის გეგმები შემუშავდა კომპანია შ.პ.ს „მ3“-ის მიერ, დაცული ტერიტორიების სააგენტოსთან, მარიამჯვარის დაცული ტერიტორიების ადმინისტრაციასთან და გარემოს დაცვისა და სოფლის მეურნეობის სამინისტროსთან მჭიდრო თანამშრომლობით.
მასალები პროაქტიულად გავრცელდა სამინისტროს ვებგვერდზე დაინტერესებული მხარეების საჯარო განხილვაში მონაწილეობის ხელშეწყობის მიზნით.