დაცული ტერიტორიების სააგენტომ დიდ ბრიტანეთში, ქალაქ რუთლენდში გლობალური ფრინველების ბაზრობა - Global Birdfair 2024 მიიღო მონაწილეობა.
ღონისძიება წარმოადგენს მსოფლიოში უდიდეს მოვლენას, რომელიც აერთიანებს ფრინველების მოყვარულებს, მკვლევრებს, ექსპერტებს, ბუნების დამცველებს, ფოტოგრაფებს.
საქართველო მსოფლიოში მტაცებელ ფრინველთა მიგრაციის ერთ-ერთ უდიდეს კორიდორად ითვლება და ის მსოფლიოში მესამე ადგილზეა, რის გამოც რეგიონი ყოველწლიურად უფრო და უფრო მეტ ტურისტსა და მეცნიერს იზიდავს.
ყოველწლიურად საქართველოს გავლით 1 000 000-ზე მეტი ფრინველი მიგრირებს სამხრეთის მიმართულებით. კოლხეთის ეროვნულ პარკში, მტირალას ეროვნულ პარკში, ქობულეთისა და ჯავახეთის დაცულ ტერიტორიებზე ფრინველთა მიგრაციის ერთ-ერთი უმნიშვნელოვანესი დერეფანი გადის.
გლობალური ფრინველების ბაზრობა - Global Birdfair-ში მონაწილეობამ დაცული ტერიტორიების სააგენტოს მისცა შესაძლებლობა ფართო საზოგადოებისთვის წარედგინა ინფორმაცია ფრინველთა უიშვიათესი სახეობების შესახებ, რომლებიც საქართველოს დაცულ ტერიტორიებზე ბინადრობენ ან მიგრირებენ.
გამოფენას ყოველწლიურად ათასობით ვიზიტორი სტუმრობს, შესაბამისად, ავიტურიზმის მიმართულებით დაცული ტერიტორიების პოპულარიზაცია კიდევ უფრო შეუწყობს ხელს საქართველოს დაცული ტერიტორიების შესახებ ცნობიერების ამაღლებას და ვიზიტორთა ნაკადების გაზრდას.