/შეიქმნა 2023 წ./

კვერეთის აღკვეთილი დაარსდა 2023 წლის 1 იანვარს. იგი შეიქმნა საჩხერის მუნიციპალიტეტის ადმინისტრაციულ საზღვრებში მოქცეულ ტერიტორიაზე, რაჭის ქედის სამხრეთ მონაკვეთზე, რომელიც მოიცავს მდინარეების − ჯრუჭულისა და ჩიხურის სათავეებს, მათი ზემოწელის წყალშემკრები აუზების ტყესა და სუბალპურ მდელოებს.კვერეთის აღკვეთილის საერთო ფართობია 14 797 ჰექტარი. აღნიშნული ტერიტორია პირობითად დაყოფილია სამ უბნად, ესენია : კვერეთის, ფრონეს და ჯრუჭის უბნები,თითოეული მათგანი გამორჩეულია თავისი ეკოსისტემებითა და ბიოლოგიური მრავალფეროვნებით.კვერეთის აღკვეთილის შექმნის მიზანს წარმოადგენს ეროვნული მნიშვნელობის მქონე ცოცხალი ორგანიზმების ველური სახეობების, სახეობათა ჯგუფების, ბიოცენოზებისა და არაორგანული ბუნების წარმონაქმნების შესანარჩუნებლად საჭირო ბუნებრივი პირობების დაცვის, აგრეთვე არსებული ბუნებრივი ეკოსისტემებისა და ბიოლოგიური მრავალფეროვნების აღდგენისა და დაცვის ხელშეწყობა.

კვერეთის გეგმარებითი დაცული ტერიტორია გამოირჩევა ეროვნული და საერთაშორისო მნიშვნელობის უნიკალური ბიომრავალფეროვნებით, ეკოსისტემებითა და ლანდშაფტებით. აქ გვხვდება  ცოცხალ ორგანიზმთა იშვიათი, უნიკალური, დამახასიათებელი და საქართველოს „წითელ ნუსხაში“ შეტანილი, გადაშენების საფრთხის წინაშე მყოფი გარეულ ცხოველთა სახეობები. მურა დათვი, წითელწინწკლებიანი კალმახი, კოლხური ხოხობი,კაკაბი  თავიანთი გამორჩეული და უნიკალური მახასიათებლებიდან გამომდინარე  კვერეთის აღკვეთილის სავიზიტო ბარათად შეიძლება ჩაითვალოს, თუმცა მათ გარდა ამ ტერიტორიაზე შეხვდებით მგელს, ტურას, მელას და ა.შ.

მისამართი: იმერეთი, საჩხერის მუნიციპალიტეტი.  ქ. საჩხერე, ივანე გომართელის 2

დეტალური ინფორმაციისათვის მიმართეთ:

ვიზიტორთა მომსახურების უფროსი სპეციალისტი - ნაზი კომლაძე 

ტელ: +995 595 70 86 37   |  ელ-ფოსტა: apa.kvereti@gmail.com