ბუნების ძეგლი
საქართველოში 45 ბუნების ძეგლია, რომელთა საერთო ფართობი 2 730.99 ჰექტარს შეადგენს. პირველი 3 ბუნების ძეგლი - ალაზნის ჭალის, ტახტი-თეფას და არწივის ხეობის ბუნების ძეგლები, 2003 წელს ვაშლოვანის დაცულ ტერიტორიებზე დაარსდა.
ბუნების ძეგლი წარმოადგენს დაცული ტერიტორიების ერთ-ერთ კატეგორიას. ბუნების ძეგლი არის ეროვნული მნიშვნელობის მქონე შედარებით მცირე ტერიტორია, სადაც წარმოდგენილია იშვიათი, უნიკალური და მაღალი ესთეტიკური მახასიათებლების მქონე კომპაქტური ეკოსისტემები, ცალკეული გეომორფოლოგიური და ჰიდროლოგიური წარმონაქმნები, მცენარეთა ცალკეული ეგზემპლარები, ან ცოცხალ ორგანიზმთა ნამარხი ობიექტები. ბუნების ძეგლი შეიძლება იყოს მღვიმე, ხეობა, მდინარის დელტა, ტყის კორომი და სხვა.
