სსიპ დაცული ტერიტორიების სააგენტო

მაჭახელას დაცული ლანდშაფტი მდებარეობს ხელვაჩაურის მუნიციპალიტეტში, მაჭახელას ხეობაში. მისი საერთო ფართობი 4292 ჰექტარს შეადგენს.

მისი შექმნის ძირითადი მიზანია უნიკალური ბუნებრივი ეკოსისტემების განადგურებისგან დაცვა, უმდიდრესი ეროვნული მემკვიდრეობის - ხალხური ხუროთმოძღვრების ძეგლებისა და ისტორიულ-კულტურული ლანდშაფტის შენარჩუნება, ადგილობრივი თემების სოციალურ-ეკონომიკური ინტერესებისა და გარემოსდაცვითი საკითხების დაბალანსება ბუნებრივი გარემოს აქტიური დაცვითა და ტრადიციული სასოფლო-სამეურნეო საქმიანობების შენარჩუნებით. 

მაჭახელას დაცული ლანდშაფტი გამოირჩევა ულამაზესი ლანდშაფტური ხედებით, ჩანჩქერებით, მდიდარი ბიომრავალფეროვნებით, ისტრიულ-კულტურული ძეგლებით, ადგილობრივი ტრადიციებითა და ფოლკლორით.

საქართველოს კანონი „მაჭახელას დაცული ლანდშაფტის შექმნისა და მართვის შესახებ“ ძალაში შევიდა 2023 წლის პირველი იანვრიდან.